FORO DEL AJEDREZ VASCO

"Berria".

Osteguna, 2008ko uztailak 3.

Madrilen «azken erasoak» salatu ditu ESAITek.

Vienara egindako bidaiaren nondik norakoak ere azaldu ditu Euskal
Selekzioaren Aldeko Iritzi Taldeak.

JON ANDER URKIAGA. BILBO.

Azken egunetako gertakarien harira ESAITek prentsaurrekoa eman zuen
atzo Bilbon. Alde batetik, Euskal Selekzioaren Aldeko Iritzi Taldeak
Eurokopa dela eta Vienara egindako bidaiaren nondik norakoak azaldu
zituen. Eta, bestetik, Espainiako Gobernuak Eusko Jaurlaritzaren dekretu
biren kontra aurkeztutako helegitea gaitzetsi zuen.

Euskal Herriko selekzioaren aldarrikapena egiteko helburu nagusiarekin
abiatu zen ESAIT Vienara. Batetik, «Eurokopa bezalako txapelketa batek
ematen dituen aukera mediatikoez baliatzea» bilatu zuen, eta, bestetik,
Michel Platini UEFAko lehendakariari gutun bat helaraztea. Bi helburuak
lortu zituen ESAITek, Platinik gutuna jaso baitzuen. «Euskal herritarren
gehiengo handi batek, bere selekzioa nazioartean ofizialki lehiatzeko
desioa» duela zioen gutunak.

Selekzioen ofizialtasuna lortzeko bidean nazioartean egin beharreko
lanaren «garrantzia eta beharra» nabarmendu zuten ESAITeko kideek.
Eta iritzi taldearen aburuz, ildo hori da euskal erakundeek jarraitu
beharko luketena. «Euskal Herriko instituzio desberdinek egon behar
zuten Vienan». Egoitz Askasibar ESAITeko kidearen ustez, «herri honi
ukatu egiten zaio nazioarte mailan ofizialki parte hartzea, eta hori
saihesteko bulegoetatik dirua banatu baino zerbait gehiago egin behar
da».

Horrez gain, «Espainiako Gobernuak euskal selekzioen aurka eginiko
azken erasoa onartezina» dela ere salatu zuen Martxel Toledo ESAITeko
kideak. Eta, era berean, elkartasuna adierazi zien erasotutako elkarte eta
federazioei.

ESAITen arabera, «Espainiako Gobernutik datozen helegiteak ez dira
estatutu edo erakundeen kontrakoak, baizik eta Euskal Herriak
nazioartean ofizialki aritzeko eskubidearen aurkakoak».

Eusko Jaurlaritzaren aurkako hitzak ere izan zituzten ESAITeko kideek,
bereziki, Jose Ramon Garai Jaurlaritzako kirol zuzendariaren kontrakoak.
Askasibarrek jakinarazi zuen, abenduan «zenbait federazioren kontrako
erasoei» erantzuterako orduan ESAITek «nazio moduan» jokatzeko deia
luzatu zionean, Garai iritzi taldearekin bat egin ordez, «bere aurka»
azaldu zen. Hala ere, ESAIT elkarlanean jarduteko prest dagoela
baieztatu zuen, besteak beste, «beharrezko» ikusten duelako «nazio
moduan eta denak bat eginik eraso bakoitzari aurre egitea». Jaurlaritzako
kirol zuzendaria horretarako prest ote dagoen zalantza adierazi
zuen. «Prest al dago Garai horretarako?».

Era berean, ESAITek ezbaian jarri zuen Eusko Jaurlaritzak selekzioen
ofizialtasuna lortzeko ahaleginean aurrera daraman politika. «Jaurlaritzak
mespretxuz tratatzen du bere kontrolpean ez dagoen dena».

© berria.info

"Gara".

Osteguna, 2008ko uztailaren 3an.

SELEKZIOAK.

ESAITek federazioei «funtzio publikoen
eskumena» kentzeko eskatu dio Lakuari.

Imanol SESMA. BILBO.

Prentsaurrekoa eman zuen atzo ESAITek Bilbon Lakuako Gobernuak
erakutsitako hainbat jokabide kritikatzeko. Bizkaiko hiruburuko
ekimenean jakitera eman zuenez, Estatu espainiarraren erasoen aurrean
euskal selekzioak blindatzeko proposamen zehatza luzatuta du ESAITek
martxotik. Horren arabera, EAEko Kirol Legearen 25. artikuluan aldaketa
soil bat egitea nahikoa litzateke federazioak eraso guztiengandik
blindatzeko. Izan ere, lege hori aldatuz, federazioei «funtzio publikoen
eskumena» kenduko litzaieke eta ezinezkoa litzaioke Estatuari
selekzioetan esku hartzea.

ESAITen aburuz, artikulu hori ez aldatzearekin «euskal selekzioa ofiziala
izatea ekidin nahi dutenek diseinaturiko markoaren esku utzi dute
erabakitzeko ahalmena».

Baina ez da lege aldaketa hori egin ez izana Euskal Selekzioen Aldeko
Iritzi Taldeak Lakuari eginiko kritika bakarra. Besteak beste,
diru-laguntzak ukatu izana, Nafarroa eta Ipar Euskal Herriko kirolariak
baztertzea eta eragile sozialekiko mesprezu jarrera izatea leporatu
dizkio. Prentsaurrekoan adierazi zutenez, gai horietan «politika oso
pobreak» ditu Eusko Jaurlaritzak, eta, ondorioz, «bere hutsegiteak
ordaintzen ari da».

Eta Eurokopan, zer?

Bestalde, ESAITek hainbat ekimen burutu zituen Eurokopak eskainiriko
aukera mediatikoez baliatuz. Taldearen ustez, ulergaitza da Eurokopa
bezalako «erakuslehio batean Euskal Herriko inolako ordezkari
instituzionalik ez izatea».

"Berria".

Larunbata, 2008ko uztailak 5.

Abuztuaren 2tik 9ra izango da Selekzioaren
Aldeko Mendi Martxa.

'Zazpiak federazio bat, EHNA eskuetan' leloa aukeratu du ESAITek
bederatzigarren ekitaldirako.

ERREDAKZIOA. DONOSTIA.

ESAITek Euskal Selekzioaren Aldeko Mendi Martxa antolatu du
bederatzigarren urtez jarraian. Heldu den abuztuaren 2an hasiko da
mendi zeharkaldia, Donibane Garazin (Nafarroa Beherea) eta Lekeition
amaituko da (Bizkaia) astebete geroago. Parte-hartzaileek zortzi etapa
egingo dituzte guztira, 20-32 kilometro bitartekoak. Egunero 7-8 ordu
egingo dituzte oinez, euskal selekzioaren aldeko aldarrikapena mendiz
mendi eramanez.

Urtero legez, mendi martxak leloa izango du. Zazpiak federazio bat,
EHNA eskuetan da aurtengo ekitaldirako ESAITek aukeratu duena. Lelo
horrekin ESAITek bi aldarrikapen uztartu nahi ditu, selekzioaren aldekoa
eta euskal naziotasunaren aldekoa.

Ez da eliteko kirolaria izan behar mendi martxan parte hartzeko. Hori bai,
sasoiko egotea komeni da, are gehiago eguneroko etapen gorabeherak
eta iraupenak kontuan hartuta. Izena emateko epea irekita dago.

Zeharkaldi osoa egin nahi izanez gero, 155 euro ordaindu beharko dira,
eta 80 euro zeharkaldi erdia egin nahi izanez gero. Egun solteetan aritu
nahi izanez gero, borondatea ordaindu beharko da. Honako kontu
korronte honetan sartu behar da dirua: 21010060000011090214.

Informazio gehiagorako, Txikiri (615-00 42 02) edo Asierri deitu (617-16
89 68).

############

MENDI MARTXA.

EGUNEZ EGUN.

Lehen etapa (abuztuak 2). Donibane Garazi-Baigorri.
2. etapa (abuztuak 3). Baigorri-Elizondo.
3. etapa (abuztuak 4). Elizondo-Donamaria.
4. etapa (abuztuak 5). Donamaria-Leitza.
5. etapa (abuztuak 6). Leitza-Tolosa.
6. etapa (abuztuak 7). Tolosa-Azpeitia.
7. etapa (abuztuak . Azpeitia-Markina.
8. etapa (abuztuak 9). Markina-Lekeitio.

############

© berria.info

"Gara".

Larunbata, 2008ko uztailaren 5ean.

Selekzioak. Esaiten prentsaurrekoa.

Beste mendi martxa bat euskal selekzio
guztien alde.

Abuztuaren 2tik 9ra egingo dute ibilaldia Donibane Garazi eta Lekeitio
artean, eta antolakuntzak bertara joan eta itzultzeko autobus zerbitzuak
jarriko ditu.

Imanol SESMA. DONOSTIA.

Beste behingoz, ESAITek Euskal Selekzioen aldeko aldarrikapenerako
mendi martxa antolatu eta bertan parte hartzeko deialdia luzatu zuen
atzo goizean Donostian egindako prentsaurreko batean. Jakinarazi
zuenez, zortzigarren edizioa izango den honetan Donibane Garazi eta
Lekeitio arteko ibilbidea egingo da abuztuaren 2tik 9ra arte.

Ibilaldiak 30 kilometro inguruko zortzi etapa izango ditu eta zazpi eta
zortzi ordu bitarteko iraupena izango du; zati batzuetako malda gogorrak
direla eta, elitekoa izan gabe ere gutxieneko prestakuntza izatea eta
mendian oinarrizkoa den materiala eramatea komenigarria dela
ohartarazi dute antolakuntzako ordezkariek.

Bestalde, gaur egun euskal selekzioen egoera zailaren inguruan
hausnarketa egiterakoan, estatu frantsesaren eta espainolaren erasoak
direla-eta «egoera gero eta latzagoa» dela adierazi zuten baina, hala ere,
ez direla «nekatzen» eta euskal selekzioen alde lanean jarraituko duela
nabarmendu zuen ESAITek.

Mendi martxan parte hartzeko izena ematen dutenek Bilbotik eta
Donostiatik Donibane Garazira joan eta Lekeitiotik berriz ere bi hirietara
itzultzeko autobus zerbitzua izango dute. Horrez gain, gosaria eta
txangoan zehar beharrezkoak izango diren ogia eta fruituak emango ditu
antolakuntzak. Gainera, ekimenarekin bat egin duten hainbat herritan
herri afariak ere izango direla iragarri zuten.

Izena eman nahi duenak bi telefono ditu horretarako: 615 004 202 eta
617 168 968. Argibideak: www.esait.org helbidean.

"Berria".

Igandea, 2008ko uztailak 6.

Zapateroren ekintzak.

JOSE RAMON GARAI.

EUSKO JAURLARITZAKO KIROL ZUZENDARIA.

Zapateroren gobernuak zalantzan jarri du Eusko Jaurlaritzaren gaitasuna
Euskadiko kirola sustatzeko; eraso zuzena egin du gure herriaren
autogobernu, kirol eta gizartearen kontra. PSOEren gobernuak Euskal
Gobernuari ukatu egiten dio gure herrialdean antolatzen diren goi mailako
kirol jarduerak sustatzeko gaitasuna, eta, aldi berean, uste du ezin
dugula kolaboratu Europako lehiaketetan parte-hartzea lortu duten euskal
klub eta taldeekin. Eta hori gutxi balitz, Euskal Selekzioen jardueraren
kontrako helegitea aurkeztu dute, Eusko Jauraritzaren diru-laguntzak
(selekzio ezberdinek lehiaketetan parte har dezaten, Euskadin,
Estatuaren barruan edo munduan zehar) kontenzioso administratibora
eramanez. Bi helegite hauek duela urtebete PSOEren gobernuak berak 42
euskal federazioen araudien kontra jarritako helegiteen bide beretik
datoz. Eta ahaztu barik gabinete horren zaletasuna kirola erregulatzeko,
lege organiko zentralizatzaileak bultzatuz.

Rodriguez Zapateroren gobernuak kirolaren monopolioa bereganatu nahi
du, eta helburu horrekin zuzenean erasotzen dio Euskadiren
autogobernuari eta Gernikako Estatutuari berari, non aurreikusten den
Eusko Jaurlaritzak eskumen osoa duela kirol gaietan.

«Euskaldunen arteko hitzarmen handiaren» letra eta arimari eraso
eginez, PSOEren gobernuak eskumen hori ere zalantzan jartzen du,
Euskadiko kirola kanpoan sustatzearen alde lanean diharduten kirolari,
talde, selekzio eta euskal erakundeen borondatearen kontra. Alde
horretatik, Zapateroren gobernuak gogorrago jokatu eta PPk --ezta lau
urtez Aznarren gehiengo osoa izan zuenean ere-- sekula egiten ausartu
ez zena egin dute.

PSOEren gobernuak helegitea aurkeztu du inoiz errekurrituak izan ez
diren eta Euskadiko Kirolaren Legean indarrean dauden alderdiak
argudiatuz. Gainera, ordezkaritza hori gisa berean dago arautua beste
erkidego autonomoetan, Andaluzian eta Aragoin, biak PSOEk
gobernatuak. Alegia, Euskadin legez kanpokoa dena legala eta normala
da beste erkidegoetan.

Azken bi helegite hauekin, Zapateroren gobernuak Eusko Jaurlaritzaren
kontrako politika muturrera eraman du, esperpento eta erridikulura,
alegia, agerian utziz PSOEren kontraesanak eta benetako aurpegia gure
autogobenuari dagokionez. Erridikulu eta larria da zalantzan jartzea
Eusko Jaurlaritzaren gaitasuna gure herrian antolatutako kirol jarduerak
babesteko. Non dago autogobernuaren ahalmena edozein proba ziklista
babestea ilegala baldin bada? Euskal Herriko Itzulia, Donostia-Donostia
Klasikoa edo Euskadiko Sei Orduak? Eta Behobia-Donostia lasterketak
Espainiaren nazioarteko harremanei eraso egiten al die? Ez al dago Eusko
Jaurlaritzaren ahalmenen artean Donostiako Hipika denboraldia
babestea? Eta Mundakako Surf txapelketa babesteak kalte egiten al dio
Espainiaren subiranotasunari? Eusko Jaurlaritzak ezin du Zegama-Aizkorri
Mendi Maratoia babestu? Kirol egokituari babesa ematea Espainiaren
eskumenak inbaditzea al da?

Ekintza horrekin, Zapateroren Gobernuak euskal kirolari berari egin dio
eraso. Eta hori guztiz negatiboa da bai gure herrian goi-mailako kirol
probak antolatzen dituzten entitateentzat bai probentzat ere. Bestalde,
desabantailan uzten ditu Estatu mailan lehiatu ondoren Europa eta
nazioarte mailako lehiaketetan parte hartzeko sailkatzen diren euskal
kirol talde eta klubak.

PSOEren gobernuak Jaurlaritzari ukatu egiten dio Tau-Baskonia edo
Bilbao-Basket babesteko eskumena, Europan lehia daitezen. Hau latza
baldin bada Tau edo Bilbao-Basket-entzat, azken batean euren
lehiakideak erakunde publikoek finantzatzen dituzte, zer izango da hain
egitura sendoak ez dituzten taldeentzat? 2007an lagundu ditugun taldeak
aipatzearren, horra hor Women´s Cup-en parte hartu zuen
emakumezkoen Athletic Club Futbol Taldea, emakumezkoen Saskibaloiko
Euroligan parte hartu zuen Hondarribia-Irun taldea, emakumezkoen
eskubaloi Europako Errekopan parte hartu zuen Akaba-Bera Bera taldea,
Union txapelketan parte hartu zuen Leka-enea mahai-teniseko taldea,
pista txirrindularitzako UCI munduko kopan parte hartu zuen CESPA
Euskadi taldea, edo Europako txapelketan parte hartu zuen Gros Xake
Taldea.

Espainiako subiranotasunari zertan egiten dio kalte xake, saskibaloi,
eskubaloi, beisbol, sofbol, txirrindularitza, boxeo, kirol adaptatu, hockey,
judo eta atxikitako kirol, karate, borroka-sambo, mendiko eskalada,
mendiko lerak, mendiko eskia, igeriketa, waterpolo, padel, piraguismo,
arraun, errugbi, surf, taekwondo, arko tiro, triatloi eta belako euskal
selekzioek lehiaketa eta lagunartekoetan parte hartzeak? Nola daiteke
Euskadiko borroka-sanbo selekzioak Gijongo nazioarteko txapelketan
ezin parte hartzea? Eta gure Xake selekzioari ere debekatzea xakeko
Scheveninge hamaika selekzioen txapelketan esku hartzea? Eta beste
hainbeste euskal kirolariek itsas joko zeltikoetan parte hartzea
debekatuz? Kayak-surfeko txapeldunek ere euren txapela itzuli behar
dute euskal selekzioa izateagatik? Legez kanpokoak al dira euskal
selekzioek jokatutako lagunartekoak Argentina, Irlanda, Ingalaterra eta
Kataluniaren aurka?

Zapateroren gobernuak, Gernikako Estatutuan jasotako kirolaren gaineko
eskumen osoari erasotzeaz aparte, eskumen titulu ezberdinak
argudiatzen ditu --nazioarteko harremanak--, kirolez kanpokoak, hain
zuzen, kirol arloan kontu hartze hau justifikatzeko. Titulu hauek, gainera,
ez dute nahiko oinarririk administrazio edo arau-bideetan eragina izateko
kirolaren antolamendu orokorrean, eta are gutxiago Estatuaren esku
hartzea legitimatzeko federazioen ordezkaritza-sisteman.

Estatutuak dioenez, Euskadik eskumen osoa du kiroletan, eta, kirol
selekzioek kirol federazioak ordezkatzen dituzte, ez Administrazioak.
Nazioarteko federazioen kideak, elkarte-izaera pribatua dutenez gero, ez
dira Estatuak, baizik eta beren selekzioekin ordezkatzen diren kirol
federazioak.

Gaur egun, euskal kirolari ate guztiak ixten zaizkio, eta ez preseski
laissez faire bidez, ekintza lotsagabe eta latzenegaz baizik. Kirol jarduera
guzti-guztietan gertatzen ari da, baita ere jakin batzuetan, non euskal
gizarteak nolabaiteko jabetza intelektuala duen.

Lau urtean, hitz goxo asko entzun ditugu, talante asko «Espainia anitza»
ren inguruan; eta azkenaldian «anitza» kendu eta «Espainia desberdina»
deitzen diote. Ekintzak ikusita, kirolari erreparatzea baino ez dago
konturatzeko hitzen azpian «bat, eta ez berrogeita hamaika» kontzeptua
dagoela eta praktikara eramaten ari direla. «Esentzia patriaren» bandera
bereganatzeko, badirudi errazena eta praktikoena Euskadiko
autogobernuaren kontra jardutea dela; eta hori da Zapateroren praktika.

© berria.info

"Berria".

Ostirala, 2008ko abuztuak 1.

Aldarrikapena oinez.

ESAITen mendi martxa bihar hasiko
da Donibane Garazin, eta abuztuaren
9an amaituko da Lekeition.

ERREDAKZIOA. DONOSTIA.

Urteroko ekitaldia ari da bihurtzen ESAITen mendi martxa. Euskal
Selekzioen Aldeko Iritzi Taldeak antolatu du aurten ere irteera, eta badira
jada bederatzi urte jarraian kalerik egin gabe. Larunbatean hasiko da
aurtengo mendi zeharkaldia, Donibane Garazin (Nafarroa Beherea) eta
Lekeition amaituko da (Bizkaia) astebete geroago. Parte-hartzaileek
zortzi etapa egingo dituzte guztira, 20-32 kilometro bitartekoak. Egunero
7-8 ordu egingo dituzte oinez, euskal selekzioaren aldeko aldarrikapena
mendiz mendi eramanez.

Urtero legez, mendi martxak leloa izango du. Zazpiak federazio bat,
EHNA eskuetan da aurtengo ekitaldirako ESAITek aukeratu duena. Lelo
horrekin ESAITek bi aldarrikapen uztartu nahi ditu, selekzioaren aldekoa
eta euskal naziotasunaren aldekoa.

Antolatzaileek behin eta berriro esan dutenez, ez da eliteko kirolaria izan
behar mendi martxan parte hartzeko. Hori bai, sasoiko egotea komeni
da, are gehiago eguneroko etapen gorabeherak eta iraupenak kontuan
hartuta. Badira malda gogorrak zati batzuetan, eta gutxieneko
prestakuntza fisikoa eta mendian oinarrizkoa den materiala eramatea
komenigarria dela jakinarazi dute antolatzaileek. Herenegun oraindik
bazegoen izena emateko aukera, eta azken unean parte hartzea erabaki
duenak harremanetarako bi telefono ditu: Txikirena (615-00 42 02) eta
Asierrena (617-16 89 68). Zortzi egunean zortzi etapa osatuko dituzte
martxan ariko direnek, baina badago aukera egun solteetan martxako
kideekin bat egin eta egun horretako ibilbidea osatzeko.

Aldarrikapena mendira eramateaz gain, martxa hartuko duten herrietan
ere antolatu dituzte ekitaldiak ibilaldiko kideei harrera egin, leloaren
inguruan hausnartu eta mezuarekin bat egiteko. Leitzan (Nafarroa) eta
Azpeitian (Gipuzkoa) esaterako, ekitaldi bereziak antolatu dituzte.
Harrera, mezu irakurketa, afari eta afalosteak izango dira aipatu bi
herrietan, eta ekitaldi bereziak egingo dira Donibane Garaziko irteeran
(10:30) eta Lekeitioko azken etapan. Mendi martxako kideek autobusak
izango dituzte Bilbotik eta Donostiatik Donibane Garazira eta Lekeitiotik bi
hiriburuetara ere bai. Gosariak eta txangoan zehar beharko diren ogia
eta fruituak ere antolakuntzak jarriko ditu. Argibideak: www.esait.org
helbidean.

############

MENDI MARTXA.

EGUNEZ EGUN.

Lehen etapa (abuztuak 2). Donibane Garazi-Baigorri.
2. etapa (abuztuak 3). Baigorri-Elizondo.
3. etapa (abuztuak 4). Elizondo-Donamaria.
4. etapa (abuztuak 5). Donamaria-Leitza.
5. etapa (abuztuak 6). Leitza-Tolosa.
6. etapa (abuztuak 7). Tolosa-Azpeitia.
7. etapa (abuztuak . Azpeitia-Markina.
8. etapa (abuztuak 9). Markina-Lekeitio.

############

© berria.info

"Berria".

Igandea, 2008ko abuztuak 3.

Donibane Garazin hasi da
ESAITen mendi martxa.

SELEKZIOA. Atzo goizean hasi zen Donibane Garazin ESAITen
aurtengo mendi martxa. Ellande Alfaro, Xabi Larre eta Martxel Toledo
mintzatu ziren hasiera ekitaldi horretan, eta Mattin Luku Iparraldeko
bertsolari gaztea aritu zen bertsotan. Donibane Garazin hasi eta Baigorrin
amaitu zen lehen etapa. Gaur Baigorritik Elizondorako ibilbidea osatu
beharko dute martxako kideek.

© berria.info

"Berria".

Osteguna, 2008ko abuztuak 7.

Esaiten mendi martxa
Tolosara iritsi da.

Selekzioak. Euskal selekzioen aldeko iritzi taldeak antolaturiko
mendi martxako partaideak Tolosara iritsi ziren atzo. Leitzatik irten ziren
goizetik, herenegun bertan jasotako ongietorriaren ondoren. Hainbat
kirolari ezagunek bat egin zuten euskal selekzio ofizialen
aldarrikapenarekin. Gaur, berriz, Azpeitira abiatuko dira mendizaleak.
Martxa etzi bukatuko da, Lekeition.

© berria.info

"Berria".

Larunbata, 2008ko abuztuak 9.

ESAITen mendi martxa gaur
iritsiko da Lekeitiora.

Mendia. ESAIT Euskal Selekzioen Aldeko Iritzi Taldeak antolatu
duen bederatzigarren mendi martxako zortzigarren etapa izango da gaur,
azkenekoa. Donibane Garazin abiatu zen martxa, Zazpiak federazio bat,
EHNA eskuetan lelopean. Atzo Azpeitia eta Markina bitarteko bidea egin
zuten parte hartzaileek. Gaurko etapa Markinan bertan hasiko da, eta
Lekeition izango du helmuga.

© berria.info

"Berria".

Igandea, 2008ko abuztuak 10.

Pausoen aldarrikapena.

ESAITek antolatutako mendi martxa
Lekeition amaitu da, eta antolatzaileak
gustura gelditu dira.

JOSEBA ZUBIAUR. BILBO.

Atzo amaitu zen ESAITek (Euskal Selekzioaren Aldeko Iritzi Taldea)
urtero antolatzen duen mendi martxa, zortzi eguneko ibilaldiaren ostean.
Iragan 2an abiatu zen, Donibane Garazitik, Zazpiak federazio bat, EHNA
eskuetan lelopean, eta atzo iritsi zen Lekeitiora. Urtero bezala, jai giroa
izan zen nagusi azken etapako helmugan, baina aldarrikapenak albo
batera utzi gabe. 08:00etan abiatu ziren atzo mendizaleak, eta 13:00ak
aldera iritsi ziren Lekeitiora.

Asier Ibaibarriaga ESAITekoa gustura agertu zen jendeak emandako
erantzunarekin: «Esperientzia ederra izan dugu aste honetan. Jendearen
portaera ona azpimarratu nahi dut; aurten, gainera, mendi martxarik
jendetsuena izan da». Atzoko egunarekin pozik gelditu zen
Ibaibarriaga: «Gaurko eguna [atzo] oso ona izan da jende aldetik.
Markinatik gehitu zaizkio mendi martxari beste 15-20 lagun, Markinatik,
Aulestiatik eta inguruko herrietatik. Gero Lekeitioko jendea ere gerturatu
zaigu, gurekin batera egiteko ibilbidearen azken zatia».

Halaber, mendi martxak sortutako giroa goraipatu zuen. «Giroa oso ona
izan da. Herrietan egin diguten harreretan oso giro polita egon da. Jende
berri dezente ere egon da aurtengo marxtan. Oso ondo konpondu gara,
eta, oro har, oso pozik gaude. Balantze ona egiten dugu». Ibilbidean
igaro dituzten herrien jarrera goraipatu zuen Ibaibarriagak. «Orain arte
etapa bukaeretan egiten genituen gure aldarrikapenak. Aurten etapa
erdian, herri batetik pasatzean ere lortu ditugu atxikimenduak. Adibide
modura, Errezil eta Gazteluko herriak aipatuko nituzke. Baina tarteko
herriak ere ezin ditugu ahaztu».

Ekimenaren garrantzia.

Gisa horretako ekitaldien garrantzia azaldu zuen Ibaibarriagak. «Ezin
dugu etsi, euskal selekzioaren aldarrikapena bere horretan dirauela
badakigun arren. Ez da pausorik ematen, baina eutsi behar zaio, ilusioa
mantendu eta aurrera egiten jarraitu. Guk eskatzen dugu EHNA gure
nortasunaren adierazpide gisa onartzea» .

Hurrengo urteari begira, aurtengo ekitaldiak indar handiago eman diela
gaineratu zuen. «Urte osoan honek lan handia eskatzen du. Borondatezko
lan handia egin duten herritarrei eskerrak ematen diegu, horrelako
jendearekin erraz egin daitezke gauzak, beren ahaleginari esker.
Datorren urterako ere gogotsu gaude, ilusioa dugu; gaur ere, agur
esateko orduan jendearen jarrera ikusita, ilusioz gaude».

© berria.info

"Berria".

Ostirala, 2008ko abuztuak 22.

Olinpiar Jokoak eta Eusko
Jaurlaritzaren jokaera olinpikoa.

MARTXEL TOLEDO.
ESAIT-EKO KIDEA.

Olinpiar Jokoak direla eta, azken bi aste hauetan ia mundu guztia
Pekinera begira jarrita dago. Telebistak, irratiak, egunkariak, azken
finean, munduko hedabide garrantzitsuenak jo eta su ari dira Pekinen
gertatzen ari den guztia kontatzen. Egitarau osoa, eguneko sailkapenak,
errekorrak, adierazpenak, abar eta abar, jokoetan gertatzen den
bitxikeria txikienak ere kasu honetan dimentsio handia hartzen duelarik.
Eta ez da harritzekoa, azken finean Olinpiar Jokoak lau urtez behin
antolatzen diren goi-goi mailako kirol ikuskizun handia izateaz gain,
batzuentzat negozio itzela ere badelako. Eta bereziki azken horregatik
dira Olinpiar Jokoak hain garrantzitsuak, kirolaren itzalpean diru asko
mugitzen delako. Irudia aitzakia hartuta, produktua saltzeko. Eta
horretarako, hedabideen kolaborazioa ezinbestekoa da. Beraz, Olinpiar
Jokoetan, neurri handi batean behintzat, interes batzuen jokoak ere
badirela esango nuke.

Aipatu medioen bonbardaketaren eraginez edo, guztiok izan dugu
aitzakiaren bat telebistari sekula baino arreta handiagoa jartzeko.
Batzuek barru-barrutik kirola bizi eta bereziki goi mailako lehiaketa
gustukoa dutelako; beste batzuek, berriz, bertan lehiatzen ari den
horietakoren bat laguna, ezaguna edo besterik gabe bere gustukoa
dutelako. Baina beste asko eta askok, agian gehientsuenak gainera,
horrelako lehiaketak bere Aberri sentimenduak bultzatuta jarraitzen
dituztela esango nuke, hau da, berea sentitzen duen nazio hori lehiaketan
parte hartzen ari delako.

Nik ez dakit horrelako sentimenduak edo beste arrazoiren batek
bultzatuta edo, Miren Azkarate anderea, Eusko Jaurlaritzako Kultura
sailburua Pekinen egon da aurreko astean eta nola ez, Euskal Telebistan
azaldu zen Olinpiar Jokoetan Espainiarekin ari diren euskal kirolari
batzuei promesa erakargarri batzuk eginez eta bide batez, besteak beste,
guztion diruarekin Eusko Jaurlaritzak bultzatuta sortu berria duten marka
ponpoxoa (BAT Basque Team) promozionatzen. Portzierto, ez nago ziur
Azkarate andereak Olinpiar Jokoetan Espainiarekin parte hartzen ari diren
Nafarroa Garaiko kirolariei laguntza berdina eskaini ote dien edo Euskal
Herrian ospatu diren txapelketa ofizialetan bezala, 16/2006 Legea aitzakia
hartuta beste aldera begiratu ote duen, beraientzako ez direlako euskal
herritarrak. Edo agian Jaurlaritzarentzat Pekinen bai dira euskal
herritarrak eta Euskal Herrian ez.

Ez naiz ni jarriko Jaurlaritzak sortu berria duen BAT Basque Team
proiektu horren bitartez edo beste modu batera, euskal kirolari batzuei
emango dien diru laguntzaren aurka. Ezta gutxiagorik ere. Besteak beste,
kirolariek jaso dezaketen laguntza guztia inoiz ez delako nahikoa izango
bakoitzak pertsonalki kirol arloan dituzten helburu guztiak betetzeko. Eta
bereziki horregatik pozten naiz Leirek, Ikerrek, Xabik, Samuk eta
Anderrek, bakoitzak bere kirolean Olinpiar Joko hauetan lortutakoaz.
Baina horrek ez du kentzen, Eusko Jaurlaritza eta bere Kirol Saila egiten
ari dena bortizki kritikatzeko. Nire ustetan ez delako zuzen jokatzen ari
eta egiten ari dena, azken finean, itxurakeria besterik ez delako.

Eusko Jaurlaritzak jakin badaki edo gutxienez jakin beharko luke, (ez dut
uste Azkarate anderea eta berak zuzentzen duen taldea, besteak beste,
Larrañaga eta Garai jauna horren motzak direnik) eramaten ari den kirol
politika eramanda, zuzenean edo zeharka, Espainiako selekzioari
laguntzen ari direla, azken finean, goi mailako euskal kirolariei jokoetan
parte hartzeagatik edota Espainiako txapeldunak izateagatik diru laguntza
emateak, zeharka bada ere, beste hori ere bultzatzen duelako. Ez dugu
ahaztu behar nazio modura Euskal Herriari parte hartzen uzten ez dioten
heinean, nazio txapelketa hauetan euskal kirolarien emaitza horiek,
Espainiak eta bere selekzioak kapitalizatzen dituztela. Beraz, eta beste
modu batera esanda, Euskal Herriak bere selekzio propioa izateko duen
eskubidea oztopatzen gaituenari, kasu honetan Espainiari, zeharka bada
ere, Eusko Jaurlaritza laguntza ematen ari da. Eta hori bidezkoa ez
izatearekin batera, lotsagarria ere bada. Baina arestian aipatu bezala, ez
dezala inork pentsa kirolari horiei laguntza ematearen aurka nagoenik, ez
da hori; niri ez zaidana egokia iruditzen zera da, Jaurlaritzak diru
laguntza horiek emateko erabiltzen duten kontzeptua, azken finean,
euskal selekzioak nazioartean bere ofizialtasuna lortzeko daraman aferan
horrek ez duelako ezer konpontzen.

Beraz, Eusko Jaurlaritzak eta bere kirol sailak egun daraman kirol politika
okerra eginez ez dugu inoiz lortuko euskal selekzioaren ofizialtasuna.
Hartu duen bideak porrotera garamatza. Etxean, EAEko federazioak,
16/2006 Lege baztertzailea aplikatuz, txapelketa ofizialetan Nafarroa eta
Iparraldeko euskal kirolariak baztertzeko determinazioa aspaldian hartua
dute, eta horrela ari dira aplikatzen. Ondorioz, Jaurlaritzarentzat bi
klasetako euskal kirolariak daude, batzuk lehen mailakoak (EAEkoak) eta
besteak bigarren mailakoak (Iparraldeko edota Nafarroa Garaikoak). Eta
hori, bazterketa bultzatzeaz gain, euskal kirolari bakoitzaren eskubideak
urratzea ere bada.

Nazioartean berriz ez da inongo urratsik egiten, eta dirudienez,
horretarako borondate politikorik ere ez zaie sumatzen. Beraz, betiko
egoeran aurkitzen gara. Bitartean, itxura egiteko edo, sortu berria duten
BAT Basque Team proiektu edo firmaren promozio itzela ari dira egiten
beste batzuen laguntzarekin, horretarako erabili behar duten diru kopuru
handia hedabideetan gastatuz. Agian, 1997ko aurrekontuetan
ESAITentzat izan behar zuen diru partida onartutakoa ere, promozio
horretara bideratuko dute. Bada, horrela bada, bejondeiela. Baina oker
dabiltza, hori ez delako bidea. Bidea, nazio klabean aritzea da, nazio
garelako. Etxean, Euskal Herriko kirolariak ordezkatuko dituen egitura
nazionalak (Federazio Nazionalak) sortu behar dira, horrek nazio bat
bezala aritzea ahalbideratuko gaituelako eta Nazioartean, Euskal
selekzioaren ofizialtasuna lortzeko egin behar diren urratsak egin behar
dira, azken finean, Euskal Herria nazioa izanez, eskubide batzuk
ditugulako eta horietako bat, nazioarteko txapelketetan geure
ordezkaritza propioarekin nazio modura aritzeko aukera izatea da. Eta
horretarako lehenik eta behin, borondate politikoa eta determinazioa
behar dira, baina horretan ere, Jaurlaritza eta bereziki kirol zuzendaritza,
nahiko hanka-motz ikusten ditut. Agian, marka komertzial bezala BAT
Basque Team promozionatzeko determinazioa bai hartu dutela, baina
nazio klabean arituz selekzioaren ofizialtasuna lortze bidean, urrats BAT
egiteko determinaziorik, BATere ez. Eta horrela, ez goaz inora.

© berria.info

"Berria".

Osteguna, 2008ko irailak 11.

BILBO.

Izarrara, euskal selekzioen alde.

Esaitek euskal selekzioen aldeko eguna antolatu dute etzirako Izarrako
Urkabustaizeko udalerrian (Araba). 'Euskal Herria, nazio bat selekzio bat'
lelopean, iritzi taldeak egitarau mardula eratu du. Ekitaldi nagusia
13:00etan izango da, eta Arabako Aldundiko hainbat diputatuk hartuko
dute parte. Kirol proben artean Goenatxok eta Mikel Urkiolak egingo
duten harri-jasotze erakustaldia nabarmentzen da. Ez dira faltako ere
kontzertu eta bestelako funtzioak.

© berria.info

"Gara".

Osteguna, 2008ko irailaren 11n.

Euskal selekzioa.

Ekimenez gainezka dator
Euskal Selekzioen Eguna.

ESAITek antolatuta, Txan Magoa, Euskal
Herria pilota desafioa edo Idi Bihotz eta Zea Mays
musika taldeen kontzertuak izango dira igande
honetan Izarran.

GARA. BILBO.

Larunbaterako planik ez daukanak, Izarrara joateko aukera polita du.
Izan ere, aurtengo Euskal Selekzioen aldeko eguna Urkabustaizen
ospatuko baita. ESAITek antolatuta, jardunaldia ekimenez beterik dator,
beti ere gure selekzioen ofizialtasunaren aldarrikapenaren aterkipean.
Horiek horrela, txikienek Txan Magoarekin gozatu ahal izango dute
goizean, 13.00etatik aurrera ekitaldi nagusia izango da, ondoren Gorka
Lazkano, Iñaki Viñaspre, Jokin Labaien eta Zigor Enbeita bertsolariak
arituko dira eta, azkenik. arratsaldeko 20.00etatik aurrera Zea Mays, Idi
Bihotz, Besterik Gabe eta Dj Hammer musika taldeen txanda ailegatuko
da. Jardunaldiak, beste behin ere, «Euskal Herria, nazio bat, selekzio bat»
leloa izango du.

Hitzordu honen inguruko argibide gehiago emateko asmoz, ESAITek
agerraldia egin zuen atzo Bilbon. Erakunde honetako kide Egoitz
Askasibarrek, Urkiola eta Goenatxo harri-jasotzaileek lagunduta, adierazi
zuenez, «leloak argi adierazten du gure filosofia. Euskal selekzio
desberdinek nazioarteko txapelketetan ofizialki aritzeko helburuarekin
jardun da ESAIT orain arte, nazio eskubidea delako beste edozein
nazioren moduan nazioarteko lehiaketetan parte hartzea. Eta Euskal
Herriko herrialde desberdinetako kirolariak bere baitan hartuko dituen
selekzioak aldarrikatu ditugu beti. Ezin dugu ulertu zelan egon daitezkeen
herrialde desberdinetako kirolariak baztertzen dituzten euskal
selekzioak».

Ildo honi eutsiz, Askasibarrek aurtengo edizioa Izarran ospatzearen
arrazoiak azaldu zituen. «Urtero Euskal Herriko herrialde desberdin
batean burutzen dugu Euskal Selekzioen Eguna. Aurten Arabari zegokion,
eta Izarrako herritar batzuek eskatuta bertan egitea erabaki genuen.
ESAITek, hilabete askotan zehar antolakuntza batzordean lanean aritu
diren herritarren lana eskertu nahi du. Izan ere, haiek hainbat hilabetetan
zehar egindako lanik gabe ez litzatekeelako posible izango egun hau
egitea».

Eguneko jarduera nagusienetako bat ekitaldia izango da. Bertan herriko
lan taldeko ordezkari multzo batek, sostengua eman duen Arabako Foru
Aldundiak eta ESAITek hartuko dute parte. Euskal selekzioen aldeko iritzi
taldeak, azken urte honetan selekzioaren inguruan gertatutakoari
buruzko irakurketa plazaratuko du. Horrekin batera, talde politiko eta
sozial ezberdinetako kideak Urkabustaizen izatea espero dute.

Kirolaren atalari dagokionez, Euskal Herria pilota desafioa deritzona
izango da Euskal Selekzioak bultzatzeko eguneko beste plater
nagusienetako bat, Hego eta Ipar Euskal Herriko pilotariak elkarren aurka
lehiatzen izango baitira. Ordu batzuk lehenago, 13.30ean Goenatxo eta
Miren Urkiola harri-jasotzaileen lana ikusteko aukera izango da Arabako
herrian.

"Berria".

Larunbata, 2008ko irailak 13.

Gaur ospatuko du ESAITek
Euskal Selekzioaren eguna.

Euskal selekzioa. Izarran (Urkabustaiz, Araba) ospatuko du gaur
ESAIT Euskal Selekzioen Aldeko Iritzi Taldeak X. Euskal Selekzioaren
Eguna. Egun osoko jaialdia izango den arren, eguerdian, 13:00etan
egingo dute ekitaldi nagusia, herriko plazan bertan.

© berria.info

"Berria".

Ostirala, 2008ko irailak 12.

Nazioa garelako.

EGOITZ ASKASIBAR.
ESAIT-EKO KIDEA.

Bihar, irailaren 13an, larunbatean, denok dugu hitzordua Izarran,
Urkabustaizeko udalerrian, Euskal Selekzioen eguna ospatuko baita.
Aurtengo leloa, Euskal Herria, nazio bat, selekzio bat izango da, leloak,
ESAITen planteamenduen muina azaltzeaz gain larunbateko moduko
ekimenen filosofia azaltzera laguntzen duelako. Betidanik adierazi izan du
ESAITek gure selekzioen ofizialtasunaren aldeko aldarria. Nazioarteko
txapelketetan, beste edozein nazio bezala, lehiatzeko eskubidea
dagokigulako. Eta nazioa garelako dagokigu eskubide hori. Ez gara,
askotan etxetik entzun ahal izan dugun moduan, erregioen, erkidegoen
edo lurraldeen arteko txapelketez ari. Berriki euskal herritarrak baztertu
gaituzten olinpiar jokoez, kirol arlo desberdinetako munduko txapelketez,
eta antzeko nazioarteko ekimenez ari gara gure selekzioen ofizialtasuna
aldarrikatzen dugunean. Argi eta garbi zehaztu dugu norabidea. Nazioa
garelako aldarrikatzen dugu nazioartean lehiatzea.

Eta euskal herritarrok osatzen dugu nazioa, zazpi herrialdeetako
herritarrok. Euskal Herriko herrialde desberdinetako kirolariak bere
barnean hartuko dituen selekzioak aldarrikatu ditugu beti. Ezin dugu
ulertu zelan egon litezkeen herrialde desberdinetako kirolariak baztertzen
dituzten euskal selekzioak. Eta badaude. Baita txapelketak ere. Euskal
txapelaren azpian batzuek EAEkoak ez diren euskal kirolariak baztertzeko
tentazioekin ari dira, behin baino gehiagotan egin dutelarik. Horregatik
diogu Euskal Herriko Federazio Nazionalak sortzea inoiz baino
beharrezkoagoa dela. Horregatik salatu ditugu orain arte izandako
bazterketak.

Aldarrikapen honen guztiaren eredu praktikoaren gauzapena dugu Euskal
Selekzioaren Aldeko Eguna. Duela hamar urte Oiartzunen hasi eta Euskal
Herriko herrialde eta eremu administratibo desberdinetan izan ondoren,
aurten Arabari, Urkabustaizen dagoen Izarrako herriari dagokio
antolakuntza. Bihar Izarra aldarrikapenerako eremua bilakatzeaz gain,
Euskal Herria, nazio bat, selekzio bat leloak finkaturiko parametroekin bat
egiten duten guztien topagunea izan behar da. Euskal Herria naziotzat
hartu izan dugu, filosofiarekin koherenteki praktikara jauzia emanaz.
Festa giroan, modu berean ondo pasatzeko aukera eta festa
aldarrikapenarekin batu nahi dugu.

Aurtengoa hamargarren ekitaldia izanik, ahalegin berezia egin dugu
egitaraua ere berezia izan dadin. Urkabustaizeko hainbat herritarrekin
hilabeteetan zehar botatako izerdiaren fruitua izango da biharkoan
dastatu ahal izango dugun uzta. Adin eta gustu desberdinetarako
egitaraua, egun osokoa, gau partea ere barneratzen duena, prestatu
dugu biharko. Goizeko 11:30etatik Txan Magoaren ikuskizunetik hasita,
eta txikienentzako paregabeko eskaintzatik abiatuz, egun guztian musika,
kultur zein kirol ikuskizun desberdinak antolatu ditugu, arratseko
zortzietan Zea Mays, Idi Bihotz, Besterik Gabe eta DJ Hamer-ek emango
duten kontzertuarekin amaitu arte. Eta aipaturiko leloa ikusita, ESAITek
eguna edukiz beteko duen ekitaldia antolatu du bertan eguerdiko ordu
batetarako.

Etxetik eta kanpotik, Euskal Herriak nazio kirol egituraketa eta
nazioarteko selekzio ofizialak izan ez ditzan erasoak inoiz baino
bortitzagoak diren honetan, euskal selekzio kontzeptuaren inguruan
desitxuratze saioak inoiz baino ugariagoak direnean, berebiziko
garrantzia dute Izarrako ekimenaren modukoek.

Hau guzti hau dela eta, nor bere burua euskal herritartzat eta Euskal
Herriak osatzen duen nazioaren eraikuntzan aportatu nahi duenak
hitzordua du biharkoan Izarran. Baita Euskal Herriko selekzioen
ofizialtasunaren alde dagoen orok ere. Idatzi honen bitartez euskal
herritar guzti-guztioi gonbit hau igorri nahi izan dizuegu. Besterik gabe,
bihar egingo dugu elkarrekin topo Izarran.

############
Euskal selekzio kontzeptuaren inguruan desitxuratze saioak inoiz baino
ugariagoak direnean, berebiziko garrantzia dute Izarrako ekimenaren
modukoek.
############

© berria.info